Облыс орталығында «Shygys CUP-2024» республикалық пікірсайыс турнирі өтті. Сайысқа қатысушылар елдің түкпір-түкпірінен жиналды. Білім бәйгесінде отыз алты құрама бақ сынады.
Шара қатысушылардың азаматтық ұстанымын, көшбасшылық дағдыларын, зияткерлік әлеуеті мен сыни ойлау қабілетін дамытуға арналған.
Турнирдің мақсаты – қоғамда болып жатқан мәселелерді ашық талдау. Сөз додасына қатысушылардың көшбасшылық қабілеттерін шыңдау.
Исахан Нұрбахыт – бірнеше жылдан бері пікірсайыс алаңында ойын ашық айтып, сөздің жілігін шағып жүр. Ол бұл турнирде сәтті өнер көрсетіп, «Үздік спикер» номинациясын жеңіп алды. Оның ойынша, мұндай шара дебатқа қатысушылардың шеберлігін шыңдай түседі.
«Shygys CUP-2024» республикалық пікірсайыс турнирінің жеңімпаздары дипломдармен және бағалы сыйлықтармен марапатталды. Үздіктерге ноутбук, смарт сағаттар тарту етілді.