Волонтер болу – өнегелі іс. Еріктілердің қоғамдағы орны ерекше. Себебі, еріктілер жасаған жақсылықтары үшін өтемақы талап етпейді. Олар көмектесуді парыз деп санайды. Өскеменде волонтер жастардың қатысуымен семинар өткізілді. Еріктілер деген кім? Олар немен айналысады? Волонтер нені білу керек? Семинарда талқыланған тақырыптар осы.
«Ауыл» партиясы жастарға тұрақты түрде қолдау көрсетіп, оларды оқыту үшін түрлі курстар ұйымдастырады. Бұл жолы партия мүшелерінің бастамасымен студенттерге арналған тренинг өткізілді. Семинардың мақсаты –студенттерді волонтерлік қызмет ұғымымен таныстыру. Семинар барысында студенттер ұйымдастырушыларға өздерін қызықтырған сұрақтарын қойды.
Волонтер жастарға көңіл бөліп, олармен қоғамдық шараларды бірге ұйымдастыру – еріктілерге материалдық жағынан болмаса да, рухани жағынан көмек, дейді шараға қатысушылар.
Ерікті болудың оң әсері көп. Бұл қызмет – белсенділікке, еңбексүйгіштік пен қайырымдылыққа талпындырады. Қоғамдық ортадағы жұмыс болғандықтан сауапты әрі жауапты іс.
Семинар соңында қатысушыларға сертификаттар мен алғысхаттар табысталды.