Руханият – біліммен толығып, технологиямен тереңдегенде ғана жас ұрпақтың көкжиегі кеңеймек. Облыс орталығында орналасқан Оралхан Бөкей атындағы орталық кітапханада ерекше жобаның тұсауы кесілді. «ТехноSHEBER» және «Мультистудия» деп аталатын бастамалар мүмкіндігі шектеулі балаларға арналған инклюзивті ортаны қалыптастыруды көздейді.
Кітапхана – тек кітап оқылатын мекен ғана емес, ол – ойдың ұясы, қиялдың қанат қаққан ордасы. Қалалық кітапханада ерекше балаларға арналған ««ТехноSHEBER»» жобасы іске қосылды. Мұнда жас жеткіншектер бағдарлама құрудан бастап, дайын бұйымды қолдарына ұстап шығуға дейінгі барлық үдерістердің сырын меңгереді. Бұл – болашақ инженерлердің алғашқы қадамы.
Айгүл Ахметжанова, Оралхан Бөкей атындағы орталық кітапхана директорының орынбасары:
Бүгін біздің кітапханамызда мүмкіндігі шектеулі балаларға инклюзиялық орта құру мақсатында «техноSHEBER» жобасы іске асып жатыр. Яғни, бүгін ашылу салтанаты. Бұл жобаның мақсаты – мүмкіндігі шектеулі балаларға 3D модельдеу, 3D бағдарламалау және де 3D басып шығару жүйесін толығымен үйрету.
Тек техникалық білім ғана емес, шығармашылық әлемге жол ашатын «Мультистудия» жобасы да назардан тыс қалған жоқ. Мұнда балалар өз қолымен салған суреттеріне жан бітіріп, анимациялық кейіпкерлерге айналдырады. Армандаған мультфильмдерін жасап, өз ойларын бейнелі түрде жеткізуге мүмкіндік алады. Бұл тек ойын-сауық емес, баланың қиялына қанат бітіру, ойлау қабілетін дамыту, білім мен өнерді тоғыстыру.
Руслан Бабиров, Оралхан Бөкей атындағы орталық кітапхананың бөлім меңгерушісі:
Біздің Оралхан Бөкей атындағы орталық қалалық кітапханада екі жаңа жоба қолға алынды. Біріншісі – «ТехноSHEBER». Мұнда балалар 3D-принтерде жұмыс істеп, өз жобаларын жасап, бағдарламалауды үйренеді. Екіншісі – «Мультистудия». Бұл балалардың шығармашылық қабілеттерін дамытуға сеп. Барлықтарыңызды кітапханамызға шақырамыз!
«ТехноSHEBER» мен «Мультистудия» – баршаға қолжетімді, тегін әрі инклюзивті жоба. Бастамалар балаларға тек жаңа технологияларды меңгертіп қана қоймайды, олардың жүрегіне сенім ұялатады, арманға жетелейдi. Осындай игі істердің арқасында кітапхана қабырғасы – болашақ өнертапқыштар мен суреткерлердің шабыт ордасына айналып отыр.
Талант Тұрсынов