Риддерде «Жасыл ел» жасағының кезекті еңбек маусымы басталды. Жастар ең алдымен жұмыстарын жоспарлап, тың нұсқаулар алды. Қыз-жігіттер қаладағы сәулет өнері үлгілерін қалпына келтіріп, көгалдандыруға да белсенді атсалысады. Биыл риддердегі «Сокол» стадионында ағымдағы жөндеу жұмыстары жүріп жатыр. 2005 жылдан бері өткізіліп келе жатқан бірегей жоба жастарды еңбекке араластыру арқылы табиғатты күтіп баптауға баулиды.
Бұл жоба жастарды жұмыспен қамтуды көздейді. Бүгінгі таңда риддердегі жұмыспен қамту орталығы арқылы «Жасыл ел» еңбек жасағына тартылған 20-ға жуық азамат абаттандыру, көгалдандыру жұмыстарымен айналысып жатыр.
Жастар алдымен стадион аумағын қоқыстан тазартты. Әрлеу жұмыстарын жүргізіп, айналаны абаттандырды.
Еңбек жасағына 16 мен 35 жас аралығындағы кез-келген азамат қосыла алады. Жоба оқушылар мен студенттерді маусымдық жұмыспен қамтып, олардың бос уақыттарын тиімді ұйымдастыруға септігін тигізеді.