Өскеменде паралимпиадашылардың қатысуымен салтанатты шара өтті. Онда аймақтағы мүмкіндігі шектеулі жандарға арналған спорт клубының бір топ спортшысы мен олардың бапкерлері марапатталды. Салтанатты жиынның өтуіне облыстық денешынықтыру және спорт басқармасы мен «Казцинк» ЖШС мұрындық болды.
Салтанатты шараға паралимпиадалық спортты дамытуға елеулі үлес қосып жүрген 60-тан астам спортшы мен 15-ке жуық жаттықтырушы қатысты. Жиын барысында сөз алған облыстық денешынықтыру және спорт басқармасының басшысы Асқар Можанов өңірде мүмкіндігі шектеулі жандар үшін кедергісіз орта құруға айрықша көңіл бөлініп отырғанын атап өтті.
Шараға «Казцинк» ЖШС демеушілік жасады. Спортшыларға түрлі сыйлықтарды табыстап, алғыс хатпен марапаттады.
Биылғы жыл спорттық шараларға толы болды. Оның ішінде Парижде өткен жазғы Олимпиада мен Паралимпиада, ерекше спортшыларға арналған Азия ойындары сияқты додалардың орны бөлек. Байрақты бәсекелерде аймақтағы паралимпиадашылар намысты қолдан бермей, бірнеше жүлдені қанжығаларына байлаған.