Облыс орталығында «WorldSkills Shygys» және «AgroSkills» аймақтық чемпионаттарына дайындық жұмыстары басталды. Мәселен, бүгін Өскемен көпсалалы технологиялық колледжінде «Болашақ мамандар» атты облыстық форсайт семинар өтті. Семинарға 140-тан астам педагог пен өндірістік оқыту шеберлері қатысады. Жиынға келген сала мамандары мамыр айында өтетін аймақтық чемпионаттың тапсырмаларын әзірлеп жатыр.
2025 жыл - Жұмысшы мамандықтары жылы. Осылайша, мемлекет басшысы Қасым-Жомарт Тоқаевтың бастамасымен қоғамда адал еңбек пен азаматтық құндылықтарды дәріптеуге басымдық берілген болатын. Ал еңбек нарығында сұранысқа ие, бәсекеге қабілетті мамандарды даярлауда «Worldskills» қозғалысының маңызы зор. Сайыстың мақсаты - өңірдегі жұмысшы мамандықтардың беделін арттырып, кәсіптік білім жүйесін дамыту. Аймақтық чемпионатты сегіз бағыт, отыз төрт құзіреттілік бойынша өткізу жоспарланған. Шараны ұйымдастырушы тарап барлық бағытты жіті бақылап, тапсырмалардың дұрыс әзірленуін қадағалайды. Сайыс тапсырмалары республикалық және халықаралық чемпионат тәжірибесіне сүйене отырып құрастырылады. Бұл өз кезегінде қатысушылардың білім деңгейін бағамдауға және үздіктерді анықтауға сеп болмақ.
Сайысқа қатысушыларын бағалайтын мамандар да арнайы іріктеуден өтеді. Іріктеуден сүрінбей өткендер ғана жарыста төрелік етуге жолдама алады.
Аймақтық чемпионатта 140-тан астам студент бақ сынайды. Олар заманауи технологияларды шебер қолданып, берілген тапсырманы жылдам әрі сапалы орындауға, үздіктер қатарынан көрінуге бар күш-жігерін салады.
Ал аймақтық чемпионат жеңімпаздары Астанада өтетін ел біріншілігіне аттанады. Республикалық кезеңде үздік нәтиже көрсеткен студенттер халықаралық сайыста ел намысын қорғауға мүмкіндік алады.