1 қыркүйектен бастап елімізде күзгі әскери қызметке шақыру кезеңі басталады. Науқан 31 желтоқсанға дейін жалғасады. Биыл өңірден 800-ге жуық азамат Отан алдындағы борышын өтеуге аттанады. Бұл туралы облыстық Қорғаныс істері департаментінің өкілдері мәлімдеді.
Мерзімді әскери қызметке 18 бен 27 жас аралығындағы, кейінге қалдыруға немесе босатылуға негізі жоқ ер азаматтар шақырылады. Қызмет ету мерзімі – бір жыл. Көктемгі науқанда аймақтан 600 сарбаз аттанған еді.
Жәнібек Сапаров, Облыстық қорғаныс істері Департаменті бастығының орынбасары:
Шекара қызметінде 100-ге жуық әскерге шақырылушы кетті. Қарулы күштеріне 300-ден аса, мемлекеттік күзет қызметіне 10, ТЖ қызметіне 20 жуық жібердік. Бізде қазір шілде айының 10-нан бастап, зерделеу жұмыстары жүргізіліп жатыр.
Әскерге шақырылушыларды хабардар ету үрдісі біртіндеп цифрлық форматқа көшірілуде. Шақыру пунктеріне келу туралы ескертулер SMS арқылы және eGov порталының жеке кабинеті арқылы жолданады. Медициналық комиссиядан әдейі жалтарған немесе келмеген азаматтарға әкімшілік қылмыстық жауапкершілік қарастырылған. Жаза айыппұлдан бастап бір жылға дейін бас бостандығынан айыруға дейін болуы мүмкін.
Марат Каримов, Облыстық қорғаныс істері Департаментінің мобилизациялық жоспарлау бөлімінің басшысы:
Келген шақыртуды елемеген жағдайда ҚР әкімшілік заңнамасына сәйкес шара қолданылып, айыппұл тағайындалады. Енді барлығы цифрлық форматта болады. Шақыртуды алған сәттен бастап азамат көрсетілген уақытта сол әскери мекенжайға баруға тиіс. Әскерге бөлу барысында әрбір шақырылушының білім деңгейі, біліктілігі, отбасылық жағдайы, денсаулығы және жеке қалау-тілектері ескеріледі.
Жиында Департамент өкілдері әскери қызметтің оң тұстарын да айтып өтті. Мәселен, әскерге шақырылушыларға борышын өтеп жүрген уақытта 13 айға «несие демалысы» беріледі. Бұдан бөлек, елдің 80-нен астам жоғары оқу орнымен жасалған келісімдерге сәйкес, мерзімді әскери қызметін абыроймен өтеп, жақсы нәтиже көрсеткен азаматтар университеттерге қосымша емтихансыз тегін қабылдана алады.
Қымбат Иманғали