Өңірде қазақ әдебиетінің мерейін асқақтатқан ерекше шара өтті. Жазушы, драматург, аудармашы, Қазақстанның еңбек сіңірген қайраткері Қалихан Ысқақтың 90 жылдығына арналған республикалық «Жарық дүние» әдеби байқауы мәресіне жетті. Жас қаламгерлер бас қосқан жиынға арна тілшісі де барып қайтты.
Оралхан Бөкей атындағы орталық кітапхана – руханияттың ордасы. Бүгін бұл шаңырақта қазақ сөзінің құдіреті тағы бір мәрте асқақтап, әдебиетке сусап келген қауым ерекше қуанышқа бөленді. Жазушы Қалихан Ысқақтың 90 жылдығына орай ұйымдастырылған «Жарық дүние» республикалық байқауы – тек әдеби дода ғана емес, жас буынға жігер сыйлаған үлкен мектеп болды.
Мерей Қайнарұлы, «Egemen Qazaqstan» газетінің ШҚО бойынша меншікті тілшісі:
Қалихан Ысқақтың мерейтойы биыл кең көлемде атап өтілді. Алтайда үлкен іс-шара болды, оны өздеріңіз білесіздер. Бүгін міне, Оралхан Бөкей кітапханасында қалалық әкімдіктің қолдауымен Қалихан Ысқақтың мерейтойына орай республикалық байқаудың қорытындысы шығып жатыр. Байқауға келіп түскен шығармалардың барлығы дерлік бірі-бірінен асады. Анау әлгі алпысыншы,сексенінші жылдардағы классик жазушыларымыз шықты ғой. Сол бір толқын қайтадан келе жатқан сияқты.
Байқауға еліміздің түкпір-түкпірінен келген жас қаламгерлер қатысып, әңгіме жанрының өрісін кеңейтуге өз үлесін қосты. Олардың шығармаларынан туған жердің иісі, халықтың сыры, өмірдің ащы мен тұщысы көрініс тапты. Әділқазылар алқасы сөз саптауы бөлек, ой орамы терең жеті қаламгерді жеңімпаз деп таныды. Бұл – қазақ прозасының жаңа толқынының келіп жатқанын аңғартқан қуанышты сәт.
Серікжан Мұрасыл, байқау жеңімпазы:
Бұл байқау қазақ әдебиетінің жандануына, қазақ әдебиетінің көркеюіне мың да бір үлесін қосады деген ойдамын. Проза ортасы ортайып бара жатқан жанр деп айтып жатыр. Ол олай емес. Оған ат салысып жатқан азаматтар, ат салысып жатқан жастар көптен-көп деймін. Тек көріну керек. Осындай байқауларға келу керек, көріну керек.Сонда ғана біздің прозамыздың деңгейі қандайда екені байқалады деген ойдамын.
Шара соңында жеңімпаздарға арнайы сыйлықтар табысталып, жастардың әдебиетке деген құштарлығы мен қаламгерлік қарымы көптің көңілін сүйсіндірді. «Жарық дүние» байқауы осылайша әдебиет әлеміне жаңа есімдерді қосты.
Талант Тұрсынов