Цифрлық технологиялар және қауіпсіздік
Облыстағы полиция қызметінде цифрлық технологиялар кеңінен қолданылып келеді. Бейнебақылау камералары, бейнеаналитика жүйелері мен ұшқышсыз ұшу аппараттары құқық қорғау органдарына қоғамдық тәртіпті бақылауға, құқық бұзушылықтарды анықтауға және оқиғаларға жедел әрекет етуге көмектеседі.
Аймақта қоғамдық қауіпсіздікті цифрлық бақылау жүйесі кеңейтіліп жатыр. Аудандарда жедел басқару орталықтарын құру жұмыстары жүргізілуде. Бұл орталықтар полиция қызметкерлеріне оқиға орнындағы жағдай туралы ақпаратты жедел алуға, құқық бұзушылықтардың алдын алуға және түрлі оқиғаларға шұғыл әрекет етуге мүмкіндік береді. Бейнебақылау камераларынан алынған кескіндер нақты уақыт режимінде беріледі. Соның арқасында көшелердегі ахуалды бақылап, қажет болған жағдайда оқиға орнына патрульдік экипаждарды жедел жіберуге болады.
Эльдар Қарсақбаев, ШҚО Полиция департаменті бастығының орынбасары:
Көшелерге орнатылған бейнебақылау камералары — құқық бұзушылықтардың алдын алудың тиімді тәсілі. Осы мақсатта Шығыс Қазақстан облысының әрбір аудан орталығында 77 бейнебақылау камерасы орнатылған. Олардан алынған кескіндер облыс орталығына және Ішкі істер министрлігіне беріледі.
Өңірдегі заң қызметкерлері оқиғаларға жедел әрекет етуге және әуеден бақылау жүргізуге мүмкіндік беретін заманауи технологияларды да пайдаланады. Ұшқышсыз ұшу аппараттары жетуі қиын аумақтарды тексеруге, із-түзсіз жоғалған адамдарды іздестіру жұмыстарын жеделдетуге және жедел шараларды өткізу кезінде құқық қорғау органдарының мүмкіндіктерін кеңейтуге көмектеседі.
Эльдар Қарсақбаев, ШҚО Полиция департаменті бастығының орынбасары:
Әуеден патрульдеу жұмыстарын қамтамасыз ету үшін ұшқышсыз ұшу аппараттары қарастырылған. Олар іздестіру және жедел-іздестіру іс-шараларында да қолданыла алады.
Сонымен қатар, жол қозғалысы ережелерінің сақталуын бақылау мақсатында әрбір аудан орталығында құқық бұзушылықтарды тіркейтін бес автоматтандырылған кешен орнату көзделген. Бұл жабдықтар жолдағы ахуалды бақылауға, көлік құралдарының қозғалысын тіркеуге, іздеуде жүрген автомобильдерді, сондай-ақ қылмыстық істерді тергеуге қатысы болуы мүмкін көліктерді жедел анықтауға мүмкіндік береді.
Нұрдәулет Қалибеков