Облыс орталығындағы Достық үйінің алаңы ерекше атмосфераға бөленді. Мұнда 1980, 1990 және 2000 жылдар стилінде ретро-кеш ұйымдастырылды. Шараның тағы бір ерекшелігі – ретро көліктер көрмесі. Жергілікті коллекционерлер сирек кездесетін автокөліктерді көпшілік назарына ұсынды. Конституция мен қала күні тұспа-тұс келгендіктен соңғы жылдары қос мерекені бірге атап өту дәстүрге айналған, дейді ұйымдастырушылар.
Ретро-кеш осымен Өскеменде үшінші жыл қатарынан өткізіліп отыр. Мерекелік жиында сонау жылдардағы танымал әндер шырқалып, бишілер сахнада мың бұрала биледі. Әр жолы қатысушылардың қатары көбейіп, мереке ауқымы артып келеді. Қала тұрғындары мен қонақтарына түрлі қызықты байқаулар, қолөнер шеберлерінің көрмесі де ұйымдастырылды.
Бақытжан Ерболқызы, Өскемен қ. Жастар ресурстық орталығының директоры:
Алдағы уақытта екі үлкен мереке келе жатыр. Сол мерекелерді тойлау қарсаңында үлкен шара өткізіп жатырмыз. Яғни, бұл мереке сол кездегі ата-аналарымыз, ата-әжелеріміздің дәуірі. Сол кездегі ретро әуендер, музыка. Айта кететіні, бұл мереке қала тұрғындарының ең сүйікті мейрамы. Ретро кешті олар ең көп күтеді. Сондықтан, әр жылы тамыз айында осы шараны ұйымдастырамыз.
Сондай-ақ, алаңға түрлі фото зоналар да қойылған. Өскемендіктер үшін бұл ретро-кеш тек көңіл көтеру ғана емес, өткенге жасалған әсерлі саяхат болды. Кешке келген қала тұрғындары да дән риза. Олар ұйымдастырушыларға өз алғыстарын жеткізді.
Кеш соңында түрлі дәуірдің киім үлгілерінен дефиле ұйымдастырылып, ең стильді қатысушылар марапатталды.
Фатима Тілейханқызы