Күні кеше Бесқарағай ауданынының қалың орманында өрт тұтанып, жүздеген гектар жерді жалмап өтті. Шығыс Қазақстан облысының Төтенше жағдайлар департаменті оқиғаның мән-жайын түсіндірді.
Табиғи апат Грачевский орман шаруашылығының Долон аумағында Грачи ауылынан 15 шақырым жерде тұтанды. Мамандардың болжамы бойынша, өрт найзағайдан шығып, 280 гектар аумақты шарпыған. Орман алқабының 150 гектары, ауылдық округтің 130 гектары жанып кетті. Төтенше жағдайлар департаменті мамандарының мәліметінше, елді мекендерге айтарлықтай қауіп келген жоқ. Өрт 22-ші маусым күні толық ауыздықталды. Өртті сөндіруге Төтенше жағдайлар департаментінің 37 қызметкері мен 60 орманшы 33 техника жұмылдырылды.