Самар ауданына "Alem Sazy" вокалдық-аспаптық ансамблі гастрольдік сапармен барды. Жергілікті тұрғындар үшін мәдениет үйлерінде бірнеше концерт берді. Бастаушы, Миролюбовка, Палатцы ауылының тұрғындары өнер ұжымының шығармашылық кеш ұйымдастырғанына дән риза. Өңірдің шағын ауылдары мен аудан орталықтарының тұрғындары аспаптық музыка кештеріне жиі қатысуға мүмкіндік алып отыр. Өнер кешінің ұйымдастырылуына ұйытқы болған Ертіс концерт ұжымы дәстүрлі гастролдік сапарларын бастады. Басты мақсат-жастардың өнерге деген қызығушылығын арттыру. Самар ауданында өткен кеш көрермендер көңілінен шыққаны анық. Тұрғындар ерекше ықыласпен өнерпаздарға қол соғып, қошемет көрсетті. «Ертіс концерт» ұжымы өңір халқын өнерімен алдағы уақытта да сусындатары хақ. Қазақ музыкасына деген шынайы сүйіспеншілік, аспаптарды асқан шеберлікпен меңгергенінің арқасында бұл ансамбль ұлттық мәдени мұраны сақтауға және кеңінен насихаттауға атсалысып жүр.