Аймақта алғаш рет ұйымдастырылған «Oskemen Open-2024» халықаралық шахмат турнирі аяқталды. 15 елден жиналған танымал гроссмейстерлер мен халықаралық деңгейдегі шеберлер өзара кім мықтыны анықтады. Халықаралық турнирдің салтанатты жабылу рәсіміне Шығыс Қазақстан облысы әкімінің орынбасары Ербол Нұрғалиев қатысты.
2 қазанда басталып, тоғыз күнге созылған шахмат бәсекесі швейцарлық жүйе бойынша өтті. 10 турдан тұрған жарыста қатысушылар екі топқа бөлініп өнер көрсетті. «Masters» турниріне рейтинде 121, «Open» санатында 74 ойыншы сынға түсті.
29 жастағы гроссмейстер Виталий Бернадский «Masters» турнирінің жеңімпазы атанды. Ал екінші орын қытайлық Бай Цзиньшиге бұйырды. Үшінші орынды Өзбекстан құрамасының мүшесі биыл Олимпиада ойындарының қола жүлдегері атанған Жахонгир Вахидов еншіледі.
«Oskemen Open-2024» ел кубогының екінші кезеңі. Бірінші кезең – мамыр айының соңында Ақтөбеде өтті. Ал, үшінші кезең – 13-21 қазан аралығында Павлодарда өтеді. Доданың шешуші кезеңі қараша айының ортасында Алматы қаласында ұйымдастырылады.