Өскеменде ерекше шара өтті. Өңірдегі еңбек ұжымдары арасында «ALTAY SPORT FEST-2024» ойындары ұйымдастырылды. Мерекелік көңіл-күй сыйлаған жарысқа аймақтың әр түкпірінен келген 40-тан астам команда қатысты.
Жаңа жыл қарсаңында ұйымдастырылған «ALTAY SPORT FEST-2024» ойындары О.Рыпакова атындағы жеңіл атлетика манежінде өтті. Шара облыс кәсіпорындары мен ұйымдарды, еңбек ұжымдарының басын қосты.
Дүбірлі додаға аудандар мен қалалардан келген 13 және облыстық басқармалардың 20 командасы, ШҚО прокуратурасы және «Казцинк» ЖШС, «Ертіс» ӘКК» АҚ бастаған бірнеше еңбек ұжымдары қатысты. Әр команда асық ату, армрестлинг, үстел теннисі, гір көтеру, тоғызқұмалақ, дойбы, шахмат, бадминтон, таяқ тарту сияқты спорт түрлерінен сынға түсті.
Жүйріктердің ішінен оқ бойы оза шапқан жеңімпаздар анықталып, арнайы сыйлықтармен марапатталды. I-орынды Күршім ауданы қанжығасына байласа, II-орынды облыстық прокуратура ұжымы иеленді. Ал, III-орын Марқакөл ауданының құрамасына бұйырды.