Жылдағы дәстүр бойынша Зайсан ауданы әкімінің бүлдіршіндерге арналған жаңа жылдық шыршасы өтті. Мерекелік шараға 105 балғын қатысты. Балалардың қуанышына аудан әкімі Аэлита Ахметсәлімқызы ортақтасып, оқушыларды Жаңа жыл мерекесімен құттықтады.
Әр ауылдық округтен келген оқушылар Айнабұлақ орта мектебінде бас қосты. Бұл күні балалар ойын ойнап, тақпақ айтып, жаңа жылдық қойылымды тамашалады. Шырша мерекесіне олар ерекше дайындалған. Түрлі ертегі кейіпкерлеріне айналған. Балғындардың костюмдері әдемілігі жағынан бірінен-бірі асады. Тасбастау ауылынан келген Елтай Шаймардан жылан жылы келе жатыр деп сол кейіпкерді арнайы таңдап алған.
Жаңа жыл балалардың асыға күтетін қуанышты мейрамдарының бірі. Әкім шыршасында Аяз ата, Ақша қар және түрлі ертегі кейіпкерлері жиналғандардың көңілін серпілтті.
Шараға әлеуметтік осал топ санатындағы және көпбалалы отбасылардың балалары қатысты. Бұдан бөлек, спортта және білімде белгілі бір жетістікке жеткен оқушылар да шақырылды.
Балалардың мерекелік шарасына арнайы келген аудан әкімі өзінің жүрекжарды лебізін білдірді.
Балаларға арналған мерекелік бағдарлама барысында ешкім назардан тыс қалған жоқ. Барлығына бағалы сыйлықтар мен тәттілер таратылды.