Биыл Қарулы күштер қатарына 1000-ға жуық шығысқазақстандық қосылмақ. Қазір облыста көктемгі әскерге шақыру науқаны басталды. Ол маусым айының соңына дейін жалғасады. Өскемендік жігіттер Отан алдындағы борышын өтеуге шекара шебіне, Қарулы күштер қатарына, Ұлттық ұлан және Төтенше жағдайлар министрлігінде өтейді.
Әскерге 18-ден 27 жасқа дейінгі денсаулығы жарамды жігіттер шақырылады. Жергілікті атқарушы органдардың жетекшілігімен қалалық және аудандық әскерге шақыру комиссиялары жұмысын бастады. БАҚ өкілдеріне борышын өтеуге шақырылған азаматтардың медициналық, психологиялық тексерістен қалай өтетіні көрсетілді.
Аудандар мен қалалардан келген болашақ сарбаздардың құжаттары жергілікті департаментте қаралады. Ал, психологиялық дайындығы жіті бақыланып, арнайы тест арқылы бағаланады.
Қазір жастар әскери борышын өтеуге қағаз құжатпен емес, смс арқылы шақырылады. Хабарлама 1414 қызметі арқылы жіберіледі.
Отан алдындағы борышын өтеуге кеткендерге түрлі жеңілдіктер қарастырылған. Әскерден оралған сарбаздар оқу орындарына түсуге мүмкіндік алады. Өмірін әскери саламен байланыстырғысы келетіндер ары қарай келісім шартпен жұмыс істейді.