ШҚО әкімі Нұрымбет Сақтағанов Шемонаиха ауданына барды. Мұнда «Жайлы мектеп» жобасы аясында салынған білім ошағында екі бірдей сыныптың ашылу салтанаты өтті. Арнайы сыныптар қажетті құрал-жабдықпен толық қамтылған. Бұдан бөлек, өңір әкімі сапар аясында аудандағы өзге де мекемелердің қызметімен танысты.
Шемонаихада қолданысқа берілеген Шәкәрім атындағы №4 орта мектеп 300 орынға шақталған. Білім ошағындағы алғашқы STEM-кабинеті – Д. Серікбаев атындағы Шығыс Қазақстан техникалық университетінің қолдауымен ашылды. Бұл сыныпта оқушылар заманауи жабдықтар мен технологияларды пайдалана отырып, инженерлік және ғылыми дағдыларын дамытады.
Мектепте керектінің бәрі бар. Тіпті робототехникаға арналған кабинет те қарастырылған. Жайлы мектеп жобасы балалардың сапалы білім алуы үшін қолайлы орта қалыптастыруға бағытталған.
Ал «Dana bala» инклюзивті білім беру кабинетін – С. Аманжолов атындағы Шығыс Қазақстан университеті қажетті ашты. Бұл кабинет ерекше білім беруді қажет ететін балалардың мектеп ортасына бейімделуіне қолдау көрсетіп, арнайы білім беру бағдарламаларын ұсынады.
Бұдан бөлек облыс әкімі Шемонаиха ауданының ауыл шаруашылығы, денсаулық сақтау және кәсіпкерлік салаларындағы жетістіктерімен танысты. Бұл бағытта да ауқымды жобалар жүзеге асырылуда. Мәселен, «Камышинское» және «Камышинское-2» ЖШС – ауданның ірі ауылшаруашылық кәсіпорындары. 2025 жылы 14 433 тонна сүт пен 627,5 тонна ет өндіру жоспарланған.
Ал «Сивер плюс» ЖШС сүт өнімдерін өңдеумен айналысады.Жобаны іске асыру үшін 350 млн. теңге инвестиция тартылған. Серіктестік тәулігіне 30 тонна өнім өндіруге қауқарлы.
Шемонаихадағы сапарының соңында облыс әкімі Нұрымбет Сақтағанов аудандық ауруханаға барды. Бүгінде 491 маман 41 мыңнан астам тұрғынға қызмет көрсетіп келеді. Денсаулық сақтау мекемесінде 816 адамға арналған консультативтік-диагностикалық орталық, 102 орындық стационар, және шұғыл медициналық көмек бөлімі бар.
Шемонаиха ауданының агроөнеркәсіптік және әлеуметтік салалары қарқынды дамып, өңірдің экономикалық әлеуетін нығайтуда.