2029 жылға дейін Шығыс Қазақстан облысына саяхаттауға келетін туристер санын 650 мыңға жеткізу жоспарланып отыр. Бұл туралы облыс әкімдігінде өткен жиында айтылды. Бұдан бөлек, инвестиция тарту және инвестициялық жобаларды іске асыру жайы талқыға түсті. Қос тақырып бойынша атқарылған жұмыстар жайлы жауапты мекеме басшылары баяндады. Өңір әкімі Нұрымбет Сақтағанов кемшіліктерді жойып, аталған салаларды дамыту туралы нақты тапсырмалар берді.
Мемлекет басшысы алға қойған міндеттерге сәйкес туризм экономикалық өсудің жаңа нүктесі болуы тиіс. Бұл әсіресе Шығыс Қазақстан үшін өзекті. Былтыр облысқа келген туристердің саны 428 мың адамды құраған. Оның ішінде 410 мыңы ішкі туристер. Ал, қалғаны шетелдік демалушылар. Мамандардың сөзінше бұл жақсы көрсеткіш.
Ал, өткен жылдың қорытындысы бойынша облысқа 768,2 млрд.теңге инвестиция тартылған. Оның ішінде жеке инвестициялар көлемі 9,6 % - ға өсіп, 545,9 млрд. теңгені құрады. Бұл бағытта да басқарма жүйелі жұмыстарды атқаруда.
Биыл жалпы құны 42 млрд. теңгені құрайтын сегіз инвестициялық жобаны жүзеге асыру жоспарлануда. Аймақ басшысы Нұрымбет Сақтағанов бір кісідей жұмылып, іске кірісуді тапсырды.
Жауаптылар барлық көтерілген мәселелер назардан тыс қалмайтынын және әр ұсыныс мұқият қарастырылатынын атап өтті.