Ішкі көші-қон саясатында кемшін тұс әлі көп. Әсіресе оңтүстіктен солтүстік және шығыс аймаққа көшіп баратындар үшін. Себебі, әр өңірдің еңбек нарығын зерттеп, соған икемі барларды бағыттау қажет. Сонда ғана көшіп келген отбасылар тұрақтап, сол аймаққа сіңіп тіршілігін тіктейді. Десе де жылы өлкесін тастап, көшті бастап жаңа мекендерге қоныстанғандар да аз емес. Солардың бірі-Шығыс шекарадағы Марқакөл ауданына оңтүстіктен келген отбасылардың жағдайын әріптестерім көріп келді.
Шымкенттен шығыстың ең шетіндегі ауылға қыс ортасында көшіп келген Лесбай Танашов бастапқыда қорыққанын жасырмады.Өйткені кез-келген көбалалы отбасы мұндай тәукелге бармайды. Дегенмен, Ақбұлақ ауылына келген бойда, баспаналы болды. Жұмысқа да орналасты. Қазір біртіндеп тірлігін тіктеп жатыр.
Бәрі жақсы болу үшін көшіп келіп жатқан отбасыларды сол ауылдың тұрғындарының жатсынбауы ең басты мәселе. Екі жыл бұрын Қызылордадан қоныс аударған Мәдина Әзизова, Ақбұлақ ауылының халқы құшақ жайып қарсы алғанын айтады.
Екі жүз орындық мектеп жабылуға шақ қалған.Бірақ былтырдан бері ауылға көшіп келген отбасылардың арқасында бала саны қайта көбейді.Шағын орталық та ашылды.
Қазір шекарадағы ауылдардың көбінде 40-50 түтін қалған. Жан саны да аз. Сондықтан елдің шеті иен қалмас үшін өңірдегі кейбір кәсіпкер, белсенді азаматтар ауылға келген отбасылардың құжатын реттеп, баспана әперіп, отынын түсіріп, қоныстандырып жатыр. Нәтижесінде тек Ақбұлақ ауылына былтырдан бері 6 отбасы келді.
Шығысқа 2023 жылы шет елден келген қандастарды қосқанда жалпы 387 отбасы оралса, былтыр 250 түтін көшіп келді. Оларға мемлекеттен 825 млн. теңге берліген. Бұл қаржы баспана алуға және бір реттік көмек ретінде төленді. Көші-қон биыл да жалғасады. Ал елге, ел қосылса құт.