Көктем келген сайын су айдындарындағы мұздың қаупі артады. Бұл кезеңде оның беріктігі әлсіреп, күтпеген жерден опырылып кетуі мүмкін. Қауіпсіздік ережелеріне бағыну – өміріңізді сақтап қалудың кепілі! Өңірлік коммуникациялар қызметінде өткен брифингте ШҚО ТЖД мамандары көктемгі мұздың қауіптілігі туралы айтып берді.
Көктемгі мұз – алдамшы әрі, аса қауіпті. Күн шуағы, жылымық жел мен сынап бағанасының күрт төмендеп не көтерілуі мұзды ерітіп қана қоймай, адам өміріне қауіп ала келеді. Көп жағдайда мұз берік болып көрінгенімен, бірер метр жерден кейін жұқарып, астында бос кеңістіктер пайда болады. Қауіпті кезеңде кейбір балықшылар мұны елемей, су айдынына шығып, балық аулайды.
Көктемде мұзға шықпаңыз. Егер мұздың қалыңдығы 10 см болса тек бір адам оның бетінде жүруіне рұқсат бар. 15 см болса шағын топқа, ал 25 см-ден асса жеңіл автомобильдерге рұқсат етілген. Құтқарушылар мұз астына түскен адамға қалай көмек көрсету керектігін түсіндірді. Құтқарушының көмегінсіз әрекет етер болсаңыз, абай болған жөн.
Брифинг соңында құтқарушылар азаматтарды қауіпсіздік ережелерін сақтауға шақырды. Әсіресе түнгі уақытта мұзға шығуға тыйым салынған. Көктемде өзендердің сағаларынан, жағалауға жақын жерлерден, қамысты тұстар мен бұлақ көздері ағып жатқан аймақтардан алыс жүргеніңіз абзал.