Катонқарағай ауднына барған аймақ басшысы инфрақұрылымды дамыту жұмыстарымен, әлеуметтік нысандардың бүгінгі жай-күйімен танысты. Сапар аясында жергілікті тұрғындармен кездесіп, өзекті мәселелерді талқылады.
Катонқарағайда салынып жатқан дене шынықтыру-сауықтыру кешені жыл соңында қолданысқа берілуі тиіс. Жобаны іске асыруға 900 млн.нан астам қаржы бөлінген. Алайда құрылыс жұмыстары бекітілген кестеге сай жүргізілмей келетін көрінеді. Нысанды аралаған аймақ басшысы олқылықты таяу арада ретке келтіріп, кешенді бірінші қыркүйекке дейін қолданысқа беру жөнінде міндет жүктеді. Бұдан бөлек, өңір әкімі талай жылдан бері жөндеу көрмеген орталық стадионды ретке келтіру қажеттігін айтты. Катонқарағай ауданында туризм саласын дамыту үшін бар жағдай жасалып келеді. Туризм саласының әлеуетін арттыру үшін кәсіпкерлерге қолдау көрсетілу керек. Бұл бағытта атқарылып жатқан жұмыс көлемі ауқымды.
Нұрымбет Сақтағанов, Шығыс Қазақстан облысының әкімі:
Катонқарағай ауданы кәсіпкерлеріне өткен жылы 114 миллион теңгеге тоғыз кредит берілді. Жыл басынан 269 миллион теңгеге тағы 22 жоба мақұлданып отыр. Оның ішінде 18 жоба бойынша 219 миллион теңгеге кредит берілді қазіргі таңда.
Катонқарағайға ағылатын азаматтардың саны жыл сайын артып келе жатқандықтан көлік ағыныда ұлғайды. Сондықтан тұрғындар облыс әкіміне аудан орталығына бағдаршам орнату қажеттігін айтты. Аталған жұмыстар 2026 жылға жоспарланған, қазіргі таңда жобалық-сметалық құжаттама әзірленіп жатыр.Туризм саласы қарқынды дамып жатқанымен, нысандарды абаттандыру жағы көңіл көншітпей тұр. Мәселен, жергілікті тұрғындар арасында «Старо-Австрийская» аталып кеткен көпір құрылысы тым ұзаққа созылып кетті. Аймақ басшысы Нұрымбет Сақтағанов бұл жұмысты сынға алды.Әрі «Рахман қайнары» шипажайына апаратын жолды ретке келтіру қажеттігін де айтты. Себебі, бұл жұмыстар жүйелі, уақытында іске асырылмаса туристерге діттеген жеріне жетуде қолайсыз жағдай тудыруы мүмкін.
Нұрымбет Сақтағанов, Шығыс Қазақстан облысының әкімі:
Катонқарағай ауданының географиялық жағдайын ескерсек экономикамызды әртараптандыру бойынша жұмыстың негізгі бағыты туризм болуы керек. Ол шағын және орта бизнесті дамытудың негізі. Және халықты нәтижелі жоғары табысты жұмыспен қамтамасыз етудің бірден-бір жолы. Мәліметтерге сәйкес ауданда туристерге арналған елу нысан ғана тіркелген. Өткен жылы келушілер саны отыз үш жарым мың адамды құрады.
Топқайың ауылы мен өзге де елді мекендерде ауызсу жүйесі жаңартылуда. Жалпы сомасы 624 миллион теңгеге екі ірі жоба іске асуда. Қосымша алты ауылда – Коробиха, Жаңаүлгі, Жамбыл, Қабырға, Өрнек және Үшбұлақта 108,8 миллион теңгеге су желісі жаңартылуда. Катонқарағай – тек көрікті мекен емес, дамудың да жаңа кезеңіне қадам басқан аудан. Инфрақұрылым, спорт, туризм мен ауызсу – өңір тіршілігінің негізі. Сондықтан іске асырылып жатқан жұмыстардың барлығы тұрғындар игілігі үшін жасалып жатыр деп сөзін түйіндеді өңір басшысы кездесу барысында.
Талант Тұрсынов