Конституция күніне арналған мерекелік шаралар аясында облыс орталығында «Өскемен өнімі» атты жергілікті тауар өндірушілер көрмесі ұйымдастырылды. Шара аясында кәсіпкерлер өз тауарларын ұсынумен қатар, бизнес, тұтынушылар мен мемлекеттік құрылымдар арасында ашық диалог орнатуға мүмкіндік алды.
Көрме отандық өнімді насихаттап, кәсіпкерлерге қолдау көрсету мақсатында ұйымдастырылды. Шараға тамақ және жеңіл өнеркәсіп, құрылыс материалдары, жиһаз жасау, ауыл шаруашылығы өнімдері мен қайта өңдеу, қолөнер, кәдесый және қолдан жасалған бұйымдар саласында еңбек етіп жүрген 100-ден астам кәсіпкер қатысты.
Назым Шайзанова, «Oskemen Creative» креативті индустрияны дамыту орталығы директорының м.а:
Өздерінің қолөнерлерін бисермен моншақ істесе де, киізден киіз басып дүние жасаса да, домбыра жасайтын шеберлеріміз бар, сол кісілер келіп, бұйымдарын қойып, көрмеде паш етіп, өздерін көрсетіп жатқандарына біз қуанып жатырмыз.
Көрмедегі жас кәсіпкерлердің бірі - Саян Ғадылбеков. Зергерлікпен 6 жылдан аса айналысады, қазіргі таңда жеке шеберханасын ашқан. Жуырда лазерлі кесу құрылғыларын орнатуды жоспарлап отыр. Сол арқылы нарықтағы бағаны төмендетіп, халыққа қол жетімді өнім ұсынбақ.
Саян Ғадылбеков, жеке кәсіпкер:
2021 жылы мен ең бірінші шеберханамды аштым. Алматыда. Сосын бір жыл жұмыс істеп, Өскемен қаласында қазақи нақышта көтеріп. Заказ өте жақсы. Мен тіпті жасасып үлгермей жатырмын. Екі шебер алдым тағы да. Алдымдағы жоспарым Өскемен қаласында, шығыс өңірінде зергерлік бұйымдардың бағасын төмендету.
Ал Әйгерім Қалибекова - ұлттық құндылықтарды дәріптеп жүрген тігінші. Ол қазақи нақыштағы киімдерді заман талабына сай етіп нарыққа шығарады. Отандық өнімге шет елден де тапсырыс бар, дейді кәсіпкер.
Әйгерім Қалибекова, жеке кәсіпкер:
Цехта 3 адам бар әзірге. Бірінші рет қатысып тұрмын осындай көрмеге. Осындай көрмелер көп болса, жақсы болар еді. Өзімізді көрсетіп, өнімдерімізді таныстыруға. Мақсатым ұлттық нақыштағы киімдерді қазіргі заманға лайықтап, тігу. Халыққа ұсыну, сұраныс жақсы.
Көрмені қала әкімі Алмат Ақышов та аралады. Жыл сайын өтетін шара жергілікті өнімді экспортқа шығаруды көздейді. Сондықтан, мемлекет тарапынан кәсіпкерлерге барынша қолдау көрсетіліп, нарыққа еркін шығуға жағдай жасалады.
Алмат Ақышов, Өскемен қаласының әкімі:
Бренд тек қана өнімдерге логотип іліп қана қоймай, оларға нақты мемлекет тарапынан көмек көрсету керек. Шет елде, Қазақстанның басқа жерінде болатын жәрмеңкелерге оларға қолдау көрсету, баруына өйткені бізге басқа нарыққа шығу керек.Өйткені бізде уникалды көптеген өнім шығарылады. Органикалық тұрғыдан пайдалы, ешқандай ГМО қосылмайды Өскеменде шығатын өнімдерге мемлекет тарапынан қолдау мақсатында біз қазір бренд жасаймыз. Ол сапаның және пайдалықтың белгісін көрсететін болады.
Өңірдегі өнім түрлері жыл сайын артып келеді. Кәсіпкерлікке бет бұрған азаматтар да аз емес. Дәстүрлі жәрмеңке алдағы уақытта да жалғасын таппақ.
ҚЫМБАТ ИМАНҒАЛИ