Аймақта ҚР Конституциясының 30 жылдығы кең көлемде тойлануда. «Ата Заң - Тәуелсіздіктің тірегі» ұлттық жоспары аясында құқықтық мәдениетті, азаматтық белсенділікті және ұлттық бірлікті нығайтуға бағытталған өңірлік бағдарлама жүзеге асырылуда. Ал, облыс орталығында 30-дан астам мәдени, спорттық және ағартушылық шаралар ұйымдастырылған. Қала көшелері безендіріліп, концерттер, фестивальдер мен спорттық сайыстар өтіп жатыр.

Конституция күніне орай өтіп жатқан шараларға қала тұрғындары мен қонақтары белсене қатысуда. Әсіресе, «Тәуелсіз елдің тірегі» челленджі мен түрлі викториналар қоғамның үлкен қолдауына ие болып жатыр. Бұл бастамалар азаматтардың құқықтық сауаттылығын арттыруға бағытталған.

Альмира Жұмабаева, Облыстық ішкі саясат басқармасы басшысының орынбасары:

Облыста құқықтық викториналар, ашық сабақтар, экскурсиялар, дөңгелек үстелдер, тәуелсіздіктің тірегі ата заң атты кітап көрмелері, ауыл шаруашылық жәрмеңкелері, спорттық турнирлар, фестивальдар челленждер мен флешмобтар өткізіледі. Ерекше жобалардың бірі ол тәуелсіз елдің тіректері челленджы, жастарымыз Конституцияның 1 баптық мазмұнын оқып, оның маңызын түсіндіріп жатыр.

Мерекелік шаралар қыркүйек айының екісіне дейін жалғасады. Бағдарлама аясында мектеп оқушылары мен студенттерге құқықтық сауаттылықты арттыруға бағытталған түрлі жобалар да бар.

Ирина Смит, Өскемен қаласы әкімінің орынбасары:

«Қазақстан Республикасының Конституциясының 30 жылдығы – мемлекетіміздің тарихындағы айтулы кезең. Осыған орай, 2 қыркүйек күні қаламыздың барлық мектептерінде «Қазақстан Конституциясына – 30 жыл» атты бірыңғай сынып сағаты өтеді. Бұл – оқушылардың азаматтық құқықтарын тереңірек білуіне, заң мен тәртіп құндылықтарын түсінуіне ықпал ететін маңызды қадам»

Мерекенің басты шарасы 30 тамыз күні Республика алаңында өтеді. Күндіз қала тұрғындары мен қонақтары «Өскемен батыры» күш шоуын тамашалап, «Дәмді Fest» гастрономиялық фестивалі мен ауыл шаруашылығы жәрмеңкесіне қатыса алады. Ал кешкісін отандық жұлдыздар сахнада өнер көрсетіп, жиналған қауымға мерекелік көңіл-күй сыйлайды.


БЕКАРЫС СЕКЕН