Өңірде 250-ден астам кен орыны бар. Облыс экономикасының негізін түсті металлургия саласы құрайды. Өткен жылы полиметал кенін өндіру 3,9 млн тоннаға жеткен. Оның ішінде қорғасын - 28 мың, мырыш - 128, мыс - 51 мың, алтын - 8,9 тоннадан асты. Бұл туралы өңірлік коммуникациялар қызметінде өткен брифингте облыстық кәсіпкерлік және өнеркәсіп басқармасы басшылығы мәлім етті.
2025 жылғы 28 тамыздағы есеппен өңірде 484 жер қойнауын пайдалану нысаны тіркелген, соның ішінде 136-ы келісімшарт бойынша және лицензиялы 238 орын. Сондай-ақ, 2012–2024 жылдар аралығында алтын, мыс, темір және сирек металдарын игеретін 10 жаңа кен орны есепке алынды.
Досжан Болатбек, Облыстық кәсіпкерлік және өнеркәсіп басқармасы басшысының орынбасары:
Соңғы он жылда мемлекеттік бюджеттен 18 млрд теңге бөлініп, игерілді. Геологиялық жұмыстарды жүргізу барысында мемлекеттік бюджет қаражаты есебінен ондаған перспективалы алаңдар анықталды. Олар Алтай, Зайсан, Катонқарағай, Күршім, Тарбағатай, Ұлан, Шемонаиха аудандарында және Өскемен қаласындағы әкімшілк бағыныстағы аумақтарда.
2023 жылы жер қойнауын пайдалануға салынған инвестициялар көлемі 372,1 млрд теңгені құрады. Оның 14,2 млрд-ы геологиялық барлауға бағытталған. Қаржының негізгі бөлігі полиметалл кенін игеруге жұмсалған. Геологтардың мәліметінше, өңірдің ресурстық әлеуеті әлі толық ашылмаған. 2024–2027 жылдарға арналған геологиялық саланы дамыту тұжырымдамасы аясында, облыс аумағында республикалық бюджет есебінен 1,7 млрд теңгеге 9 нысанда барлау жұмыстары жүргізілуде.
Дидар Ерболатқызы