Глубокое ауданына қарасты Верхнеберезовка ауылында отбасылық дәрігерлік амбулаторияның ашылу салтанаты өтті. Жоба өңірде жүзеге асырылып жатқан «Ауылдық денсаулық сақтауды жаңғырту» ұлттық жобасы аясында қолға алынды. Аурухана бір уақытта 25 адамды қабылдауға қауқарлы. Енді басы ауырып, балтыры сыздаған жандар ем іздеп аудан орталығына бармайды.
Отбасылық амбулаторияда 4 күндізгі төсек-орын қарастырылған. Жалпы ауданы 440 шаршы метрді құрайтын ғимаратта 23 кабинет бар. Оның ішінде физиотерапия және емдік дене шынықтыру бөлмелері, акушер-гинекологиялық және стоматологиялық кабинет бар. Ауыл жұрты бұл сәтті асыға күткен. Себеп сол, аймақта толыққанды бұндай ғимарат болмаған. Ескі емхана апаттық жағдайда деп танылған соң, 2018 жылдан бері дәрігерлер техникалық колледждің ғимаратында науқастарды қабылдап келген.
Мирхат Увазыров, Глубокое аудандық аурухананың бас дәрігері:
Бүгін бізде керемет жаңалық. Бізде Верхберезовка ауылында жаңа заманауи дәрігерлік амбулатория ашылып жатыр. Бұл бізде керемет жаңалық. Өйткені, бұрынғы амбулаториямыз апаттық деп саналды, 1951 жылғы. Сондықтан бізге қиыншылықтар болды.
Ауылда 1 900 адам тұрады. Оның 330-ы артериялық гипертония, 110 адам қант диабеті бойынша диспансерлік есепте тұр. Сондай-ақ, ауылда 70 мүмкіндігі шектеулі жан бар. Жаңа ғимарат олар үшін де ыңғайлы етіп жабдықталған.
Дүйсенбай Ұрұмбаев, Глубокое ауданының тұрғыны:
Осы ауылдың көне тұрғындарының бірімін, байырғы тұрғындарының бірімін. Мына салып жатқан отбасылық амбулатория мемлекетіміздің маңызды мерекелерінің бірі Конституция күні қарсаңында өте тамаша игі іс.
Жаңа амбулаторияның штаттық құрамы толығымен жасақталуда. Жақын күндері қосымша стоматолог-дантист, емдік дене шынықтыру нұсқаушысы, физиотерапия маманы жұмысқа қабылданбақ. Құрылыс барысы депутаттардың тұрақты бақылауында болды.
Аманбай Нұркенов, «AMANAT» партиясы ШҚОФ атқарушы хатшысының орынбасары:
Бұл ғимарат «Аманат» партиясының сайлауалды бағдарламасына енген болатын, 2023-2027 жылдарға. Енді бұл ғимаратты ауыл тұрғындары ұзақ уақыт күтті. Бұл сайлауалды бағдарламасына енді. Өйткені біз сайлаудың алдында біздің депутаттар біздің халықтан осы талап-тілектерін жинаған болатынбыз.
Ауылдарда медициналық пункттер салудың басты мақсаты – халыққа сапалы медициналық көмек көрсетіп, аудан орталығына немесе қалаға бармай-ақ қызмет алуына мүмкіндік жасау. «Ауылдық денсаулық сақтауды жаңғырту» бағдарламасы аясында салынған нысандардың ерекшелігі – қажетті медициналық құралдармен және жиһазбен толық қамтамасыз етілуінде. Бұл жұрттың денсаулығын нығайтуға, профилактикалық шараларды уақытылы өткізуге және скринингтік тексеру жүргізуге ықпал етеді.
Дидар Ерболатқызы