Еңбек адамын ұлықтау – қоғамның басты міндеті. Облыс әкімі Нұрымбет Сақтағанов еңбегімен ел дамуына үлес қосып жүрген азаматтарға құрмет көрсетті. Өз ісіне адалдық пен кәсіби шеберлік танытқан шахтерлер мен құрылысшылар алғыс хаттар мен мемлекеттік наградаларға ие болды. Олар үшін бұл — еңбектің еленуі ғана емес, жұмыстарына тың серпін беретін қуанышты сәт.
Конституцияның 30 жылдығы мен шахтер күніне орайластырылған шараға өңірдің тау-кен саласының ардагерлері, құрылыс мамандары мен еңбек адамдары жиналды. Жиынға қатысушыларды облыс әкімі Нұрымбет Сақтағанов құттықтап, еңбегімен ерекшеленген он төрт маманға марапаттар табыстады.
Нұрымбет Сақтағанов, Шығыс Қазақстан облысының әкімі:
Біздің өңір еліміздің негізгі индустриялды, ғылыми, мәдени орталықтардың бірі. Жерлестеріміздің еңбегі, табандылығы мен жауапкершілігінің арқасында ел экономикасы дамып, әлеуметтік сала жетілдірілуде. Жастарға және келер ұрпаққа үлкен-үлкен мүмкіндіктер ашылуда.
Мемлекет басшысының Жарлығына сәйкес, «Еңбек даңқы» орденімен 1 адам, «Ерен еңбегі үшін» медалімен 9 маман құрметке бөленсе, 4 қызметкерге ҚР Өнеркәсіп және құрылыс министрлігінің алғыс хаттары берілді. Соның ішінде тау-кен саласының үздігі Мирас Нұртазин «Ерен еңбегі үшін» медаліне ие болды.
Мирас Нұртазин, «Казцинк» ЖШС Риддер-Сокольный кеніші өндіру жұмыстарының жерасты тау-кен учаскесінің өткізгіші:
Мен бұл салада 14 жыл болды жұмыс істегеніме. Орысша «проходчик» деп айтады. Мұндай марапатты бірінші рет алып тұрмын, қобалжып. Марапаттағандарына көп рахмет. Шахтерлердің бәріне мол денсаулық тілеймін. Адал табыс.
Жеңіл өнеркәсіп саласында еңбек етіп жүрген мамандар да назардан тыс қалған жоқ. Тігін цехының аға шебері Юлия Чернышева саланың дамуына қосқан үлесі үшін марапатталды.
Юлия Чернышева, «АЛЬПРИМА» ЖШС тігін цехының аға шебері:
Мен «Альприма» ЖШС тігін цехында аға шебер болып жұмыс істеймін. Биыл осы салада еңбек етіп келе жатқаныма 30 жыл толады. Жалпы, барлық марапаттар ең алдымен жұмысшы мамандық иелеріне арналуда. Біздің кәсібімізге де осындай құрметтің көрсетіліп жатқаны қуантады. Себебі, кезінде тігін өнеркәсібі өз мәртебесін жоғалтып алған еді, қазір ол қайта жанданып келеді. Бұл мемлекет үшін аса қажет, ал мен осы салада қызмет атқаратыным үшін қуанамын.
Бұл азаматтардың еңбегі – елдің өркендеуіне қосылған үлес. Оларға берілген марапат – көп жылғы маңдай тердің, табандылық пен адал еңбектің жемісі.
Фатима Тілейханқызы