Диас Ескермесовтың өмір деп соққан жүрегі өмір сүруге талпындырды. Әу баста оның адам қатарлы өмір сүріп кететіндігіне дәрігерлер де күмәнмен қараған еді. 8 айлығында дүниеге келген Диас алғашында тіптен өздігінен демала алмаған. Өмірі үшін арпаласқан ол 1-2 ай дегенде есін жинап, адам қатарына қосылған. Бүгінде оның ІІ топтағы мүгедек жан екендігі қарамастан спорт саласындағы жеткен жетістіктері бір төбе. Диастың адам қатарына қосылды деген ата-ананың қуанышы көпке созылмады. Баланың тілі ерте шығып, есте сақтау қабілеті жақсы болғанымен, оң жақ қолы мен екі аяғы толығымен істен шыққан. Сал ауруына шалдыққан Диастың өмірі бұдан әрі былай жалғасуы мүмкін еместігін түсінген ана шұғыл түрде ота жасау қажет деп шешеді. Ресейдің Новосібір қаласындағы білікті маманға қаратады. Алайда дәрігерлер Диастың жағдайында бір емес бірнеше рет ота жасау керек екендігін айтады. Осылайша балаға 14 жерінен ота жасалады. Екі аяғынан тік тұрып жүріп кететіндігіне кәміл сенген Диас кейіннен ұсынылған мүгедектер арбасынан да бас тартады. Өмірдің сынымен қоса сыйы да бар екендігін ескерсек, 11 жасында өздігінен жүре бастаған Диастың өмірі әп сәтте жақсы жағына өзгере бастайды. Біртіндеп ата-анасы баласының денсаулығын нығайту мақсатында қол күресі мен ат спортына қатыстырады. Уақыт өте келе иппотерапия өзінің тиімділігін көрсете бастайды. Осылайша, ат спортынан Лос Анжелестегі әлемдік параолимпиадада қазақтың туы желбірейді. Бүгінде ол қол күресінен Азия чемпионатының күміс жүлдегері, Қазақстан чемпионы. Бүгінде Диас қосымша Өскемен қалалық №3 ХҚКО-да «Жұмыспен қамту және әлеуметтік бағдарламаларды үйлестіру басқармасының» арнайы бағдарламасы арқылы ақпанның 20-нан бастап ешбір емтихансыз жұмысқа қабылданады. Бөлімде қазір мүмкіндігі шектеулі 5 адам жұмыс істейді. Жұмысқа қабылданған алғашқы күннен-ақ Диас өзінің жан-жақтылығын көрсете бастаған. Диастың өмірі көпке үлгі. Сын сағаттардағы тағдыр сынағына мойымай, сан түрлі қиындыққа төзе білгені былай тұрсын, өмірлік жолынан адаспай тура жолды таба білуі ерліктің белгісі іспетті.