Ел Конституциясының 30 жылдығына орай облыс орталығында азаматтық форум өтті. Жиын мемлекет пен қоғам арасындағы ашық диалог алаңына айналып, өңірдің түкпір-түкпірінен келген жүзден аса белсенді азаматтардың басын бір арнаға тоғыстырды.
Форум – билік пен белсенділердің басын қосуға сеп болды. Әсіресе жиында азаматтық қоғамның рөлі кеңінен талқыланды. Дөңгелек үстел басында сенат депутаты Бибігүл Нұрғалиқызы үкіметтік емес ұйымдардың әлеуеті мен бастамаларына ерекше тоқталды. Парламент қабырғасында бірқатар заң жобаларын әзірлеу кезінде үкіметтік емес ұйым өкілдері сарапшы ретінде қатысқаны мәлім. Депутат өткен сессияның өзінде бұндай азаматтардың саны 300-ге жуық болғанын жеткізді.
Бибігүл Жексенбай, ҚР Парламенті сенатының депутаты:
Қазірдің өзінде ұлттық құрылтайдың аясында 16 заң өмірге келіп, тағы бесеуі парламент қарауында жатыр. Яғни бұл – үкіметтік емес ұйымдардың азаматтық қоғам өкілдерінің бастамасымен дүниеге келген заңдар. Яғни ол ертең өмірге қажеттілігімен қатар, орындалатын нақты заңдар, деп айтуға болады. Парламент сессиясының қорытындысы бойынша өзіңіз естігенде боларсыздар, тек қана осы сессияның өзінде 158 заң жобасы қаралып, 89 заң қабылданды. Олардың қатарында өздеріңіз білетіндей ұлттық құрылтайда айтылған мәселелердің бәрі қамтылған.
Облыс әкімінің орынбасары Ербол Нұрғалиев азаматтық сектордың жетілуін жоғары бағалады. Әсіресе қоғам мен мемлекет арасындағы әріптестіктің жаңа кезеңге аяқ басқанын ұмытпау керек.
Ербол Нұрғалиев, ШҚО әкімінің орынбасары:
Бүгінгі форумның тақырыбын өздеріңіз көріп отырсыздар. «Өңір үні: Қоғамдық кеңестер – өзгерістер драйвері» деп атады. Бұл тектен тек аталған жоқ. Ол азаматтардың жергілікті басқаруға қатысу және өз өміріне қатысты шешімдер шығаруға ықпал ету. Негізгі даму бағыты ретінде көрсетіліп отыр.
Форумда талқыға салынған басты тақырыптар – қоғамдық кеңестердің жаңа рөлі мен бақылауды күшейту, халықтың шешім қабылдау процесіне тікелей қатысуы және азаматтық сектордың дамуы болды. Сөз алғандар ашықтық пен есеп берушілікті арттыруды, азаматтық бастамалар мен ресурстық қолдауды күшейтуді ұсынды.
Аяужан Әшімова, ШҚО Азаматтық Альянсының төрағасы:
Осы форум аясында айтылған бірқатар ұсынымдарды және кейбір мәселелерге тоқтала кетуді жөн көріп отырмын. Біз үнемі осы қоғамда орын алып отырған мәселелерді айтып отырамыз. Дегенмен тәжірибе алмасу, өзгелерге мотивация беру, мәселені шешу жолдарын айтып өту, бір-бірімізге көмектесу бұл - өте маңызды іс.
Жиын соңында белсенді азаматтарға алғыс хаттар табысталды. Қатысушылар форумды қоғам мен билік арасындағы сенімді арттыратын маңызды қадам ретінде бағалады.
Дидар Ерболатқызы