Биыл еліміздің Ата Заңы – Конституциямыздың қабылданғанына 30 жыл толып отыр. Айтулы күн аясында мемлекетіміздің түкпір-түкпірінде игі шаралар ұйымдастырылуда. Соның бірі –Ұлан ауданы Төменгі Тайынты ауылында өткен «Мейірім» акциясы. Мерекелік жиынға әріптесім де барып қайтты.
«Үміт» балалар үйінің «Царская Долина» лагерінде өткен шараға Шемонаиха ауданының әкімдігі мұрындық болды. Делегация мүшелері жас тәрбиеленушілермен тілдесіп, олардың тыныс-тіршілігімен танысты. Бұл жүздесу – тек мерейтойлық басқосу ғана емес, жас буынға болашаққа деген сенім сыйлаудың көрінісі.
Салтанат Сағиева, Шемонаиха ауданы әкім аппаратының бірыңғай кадрлық қызметінің басшысы:
Біз балалар үйінің осы жердегі тәрбиеленушілеріне Ата Заңымыздың 30 жылдық мерейтойына орай ұйымдастырылып жатқан «Мейірім» акциясының аясында келіп отырмыз. Біз сол Шемонаиха ауданы әкімдігінен ұжымдардың, ұжымдарымызбен келіп осындай балалармен кездесу өткізіп, біраз әңгімелесулер жүргіздік.
Бүгінгі таңда ауылдық жерлерде еңбек адамдарына деген қажеттілік артып отыр. Осы орайда өскелең ұрпаққа кәсіптік бағыт-бағдар берудің маңызы зор. Мемлекет басшысы жариялаған «Жұмысшы мамандықтар жылы» аясында балаларға болашақ мамандығын дұрыс таңдау, қоғамға пайдасын тигізу, туған ауылына қызмет ету жөнінде кеңінен түсіндірілді. Бұл әңгімелер балалардың ой-өрісін кеңейтіп қана қоймай, болашаққа деген ынтасын арттыра түсті.
Оксана Назарова, «Үміт» балалар үйінің тәрбиеленушісі:
Менің мұнда тұрып жатқаныма алты жыл болды. Осы уақыт аралығында көп нәрсеге қол жеткіздім, жаңа қырларымды аштым. Алғаш рет сахнаға шығып, би билеп, ән айттым. Бұл жерден көп достар таптым. Мұндағы адамдар – менің отбасым. Тәрбиешілер бізді әрдайым қолдайды, олар бізге ата-анамыздай қамқор. Сол үшін ерекше алғыс айтқым келеді. Өйткені дәл осы жерде мен шын мейірім мен сүйіспеншілікті сезіндім.
«Үміт» орталығы тәрбиеленушілерінің өміріне де ерекше көңіл бөлінуде. Мұнда балаларға жайлы тұрмыс пен сапалы білім алуға толық жағдай жасалған. Тіпті «Таза Қазақстан» акциясы аясында балалар тұрақты түрде сенбілік өткізіп, қоршаған ортаны қорғауға атсалысуда.
Анель Тілеулесова, «Царская Долина» жазғы сауықтыру лагерінің басшысы:
Бүгінгі күні міне біздің орталығымызға келіп жатқан Шемонаиха ауданының әкімшілігі Конституция күнімен бізді құттықтап келіп отыр, балаларды. Шемонаиха ауданының әкімшілігіне біздің, басты біздің балаларға деген мейрімдеріне, ыстық жүректеріне мың алғыс айтамыз.
Кездесу соңында балалар мен келген қонақтар мәдени-рухани кеште бас қосты. Ән мен жырдан шашу шашылып, көркем өнер мен шаттыққа толы концерт ұйымдастырылды. Осындай игі бастамалар өскелең ұрпаққа қамқорлықтың үзілмейтінін, олардың қашанда қоғам назарында екенін тағы бір мәрте дәлелдеді. «Мейірім» акциясы – ізгіліктің мерекесі. Балғын жүректерге қуаныш сыйлаған шара алдағы уақытта да жалғасын таппақ.
Талант Тұрсынов