Елдегі ең үздік жоғары оқу орындарының бірі – Д.Серікбаев атындағы ШҚТУ. Білім ордасындағы қабылдау комиссиясы жаңа оқу жылына талапкерлердің құжаттары мен өтініштерін қабылдауға дайын. Университет шетелдік серіктестермен және кәсіпорындармен бірлескен және қос дипломдық білім беру бағдарламаларын ұсына отырып, көптеген бағыттар бойынша мамандарды дайындайды. Қабылдау комиссиясының кеңесшілері мен хатшылары талапкерлерді барлық қажетті ақпаратпен қамтамасыз етіп, жан-жақты қолдау көрсетеді.
Болашақ студент үшін маңыздысы – мамандықты шалыс баспай таңдау. Мектеп бітіруші түлек - Анастасия Фадеева қазірден бастап тынбай ЖОО – на түсу үшін ізденісте жүр. Таңдауын жасап та қойған. Анасы екеуі Д.Серікбаев атындағы ШҚТУ – не келіп, құжаттарын тапсыру үстінде. «Ақпараттық жүйелер» мамандығын таңдаған Анастасия болашағым жарқын боларына сенімдімін, дейді.
Дәулет Серікбаев атындағы Шығыс Қазақстан техникалық университеті – еліміздің шығысындағы ірі ЖОО бірі. Университет сәулет және құрылыс, машина жасау, жер туралы ғылымдар, бизнес және кәсіпкерлік, цифрлық технологиялар және жасанды интеллект, энергетика, металлургия және пайдалы қазбаларды байыту бағыттары бойынша білім береді. Республикалық бюджет қаражаты есебінен мемлекеттік білім гранты конкурсына қатысу үшін өтініштерді қабылдау 13-20 шілде аралығында өтеді. Оқуға құжаттарды тапсыру орыны – Өскемен қ., Серікбаев к-сі, 19, Д. Серікбаев атындағы ШҚТУ-нің бас ғимаратында орналасқан.
Қазақстан Республикасы 2024 - 2025 оқу жылында білім беру бағдарламаларының техникалық және ауыл шаруашылығы топтары бойынша кадрларды даярлауға арналған мемлекеттік білім гранттарын бөлді. Биыл техникалық университетте жаңа мамандық түрлері де оқу бағдарламасына қосылды.
Атап өтейік, бүгінде Д.Серікбаев атындағы ШҚТУ халықаралық деңгейде жоғары бағасын алып үлгерген елдегі үздік оқу орындарының бірі. Университеттен түлеп ұшқан студенттердің жұмысқа орналасу пайызы жоғары. Бұдан бөлек, білім ордасы елдегі жетекші техникалық университеттердің ұлттық рейтингінде үздік үштікте.