2014 жылы Зайсан ауданында есігін айқара ашқан «Ертөстік» балабақшасы мерейлі мерейтойын атап өтті. Педагогикалық тәжірибесі озат тәрбие ошағында балғындар шетінен дарынды.Аудандық, облыстық деңгейде өткен түрлі жарыстарда тәрбиешілер мен балғындар топ жарып үлгерген.
Салтанатты шараға аудандағы өзге де балабақша мамандары тегіс жиналды. Себебі, «Ертөстіктің» бұл салада өзіндік ізі, ауыз толтырып айтар жетістігі мол. Мұндағы педагогтар екі жыл қатарынан облыстық сайыста бас жүлдені қанжығаларына байлаған. Республикалық сында да жоғарғы нәтиже көрсеткен. Мерейтойға мекеме ұжымы тыңғылықты дайындалған.
Балаға деген сүйіспеншілік пен махаббат, ұрпақтар сабақтастығы. Әрбір мектепке дейінгі мекеме осы бағытта қызметін ұйымдастыруы қажет дейді,мұндағылар. Салтанатты шара барысында бүлдіршіндер концерттік бағдарламаларын ұсынды. Ән айтып, би биледі, өлең оқыды. Ал балғындардың өнеріне тәнті болған ата-аналар да балабақша ұжымын бір кісідей мерейлі мерекемен құттықтады.
«Ертөстік» балабақшасы 140 орынға шақталған. Әр топтың бөлмелері жаңа үлгідегі жиһаздармен жабдықталған. Балабақша аймағы да көгалдандырылған, ойын алаңдары жасақталған. Мұндағы оқыту мен тәрбие беру ісі қазақ тілінде жүргізіледі.
Білім негізі – бастауышта. Бақшадағы тәрбие – бар ізгіліктің бастауы. Мықты білімнің берік іргесі. Ал, педагогикалық тәжірибесі озат тәрбие ошағы осы бағыттағы жұмыс қарқынын арттыра түспек.