Облыстық көпсалалы Онкология және хирургия орталығына көршілес Ресей елінен жоғары санатты дәрігерлер келді. Олар орталық мамандарымен бірге бір апта бойы тәжірибе алмасады. Бұл бастама екіжақты ынтымақтастық аясында ұйымдастырылды.
Көрші елдің мамандары онкология орталығының жұмыс барысымен танысып, жергілікті дәрігерлермен бірге күрделі операция жасайды. Бұдан бөлек, торакалды хирургия мен реанимацияның өзекті мәселелерін талқылайды.
Осындай халықаралық ынтымақтастық медицина саласының дамуына және науқастарға жоғары сапалы көмек көрсетуге ықпал етеді. Орталық директоры Гүлмира Сағидуллина мұндай кездесулердің маңызы жоғары дейді.
Облыстық онкология орталығы өкпе мен көкірек қуысының қатерлі ісіктерін емдеуде заманауи әдістерді, соның ішінде бейне-көмекші торакоскопияны сәтті қолдануда. Бұл шағын инвазивті әдіс арқылы науқастар ауырсынуды аз сезініп, тез қалпына келеді. Қатерлі ісікті алып тастағаннан кейін науқастар заманауи жабдықталған реанимация бөліміне түсіп, тәулік бойы бақылауда болады.
Мұндай серіктестік тәжірибе мен білімнің шекарасын кеңейтуге мүмкіндік береді, дейді дәрігерлер қауымы.