Құтқарушылар жолаушыларға көмекке келді

Облыста бірнеше ауданда боран соғып, қалың қар жауып тұр. ТЖД мамандары азаматтарды жолға шықпауға ескертіп, хабарламалар таратып жатыр. Әйтсе де бұны елемеген жүргізушілер көп. Сондай-ақ бүгін облыстық Білім басқармасы Өскемен қаласында көктайғаққа байланысты екі ауысымның оқушыларын қашықтан оқуға ауыстырды. Өзге аудандардағы мектептер де қашықтан оқып жатыр.

Глубокое ауданындағы «Шемонаиха-Секисовка» трассасында жеңіл көліктер қар қамауында қалды. Құтқарушылар жедел жетіп, көлікті батқан жерінен алып шықты.

Қазіргі уақытта ШҚО ТЖД ақпараты бойынша автожолдардың 5 учаскесі жабылды. «Қазгидромет» ақпараты бойынша 23 қаңтарда ауа температурасының 15-20-қа дейін күрт төмендеуі күтіледі. Облыстың шығысында 25-30 градус аяз болады. Осыған байланысты азаматтарға елді мекендерден алыс жерлерге шықпауды ескертеміз. Күн райы орныққанша алыс жолдан бас тартқан абзал.