«Казцинк» компаниясы өңірде түрлі әлеуметтік жобаларға қолдау көрсетіп келеді. Бұл жолы өндіріс орны таяуда ашылған «JastarOskemen» комьюнити орталығындағы дыбыс жазу студиясына қажетті жабдықты сатып алуға демеушілік етті. Комьюнити орталық шығыстың жалынды жастарын біріктіріп, жаңа идеялар мен тың ойларды жүзеге асыруға мүмкіндік беретін алаң.
Әлеуметтік жобаларды белсенді қолдайтын ірі металлургиялық компанияның арқасында жастар орталығының дыбыс жазу студиясында жаңа жабдық пайда болды. Бұл микшерлік пульт, микрофон, гитара, домбыра, колонкалар мен құлаққаптар. Шығармашыл жастарға дыбыс жазуға арналған бұл заманауи жабдықтар студияда музыкалық бағытты дамытуға үлкен септігін тигізеді.
Ашылғанына көп уақыт болмаса да, орталыққа келетін жастардың қарасы қалың. Әсіресе тегін ән жазуға мүмкіндік беретін заманауи жабдықталған студия, би үйірмесіне сұраныс жоғары.
Жастар орталығына қосылып, өз бастамаларын жүзеге асыруды көздеген кез-келген белсенді бұл орталықтан өз орнын таба алады. Қазір студияға жазылғысы келетіндер саны аз емес, сондықтан орталық басшылығы арнайы тізім жасаған.