Абайдың «Жидебай-Бөрілі» мемлекеттік тарихи-мәдени және әдеби-мемориалдық қорық-музейінде ұстаз, ақын Ахат Шәкәрімұлының шығармалар жинағы таныстырылды. Кітап ақынның зайыбы Бәтима Жәкенованың музейге тапсырған материалдары мен қордағы қолжазбалар негізінде дайындалған. Ұлы ақын Абай Құнанбаевтың өмірі мен шығармашылығын дәріптеуде музейдің ғылыми тұжырымдамасы дайындалған. Ол 7 бағыттан тұрады. Тұжырымдаманың бір бағыты бойынша Абай музейіне тікелей қатысы бар тұлғалардың мұрасын қорда бар деректермен толықтырып шығару және монографиялар мен ғылыми зерттеулер жазу жоспарланған. Оның аясында Ахат Шәкәрімұлы шығармаларының бір томдық жинағы жарық көрді. Жинаққа ақынның 166 өлеңі, 5 поэмасы және естеліктері енген. Кітап 448 беттен тұрады. Оның ерекшелігі – әрбір өлең жыл және альфавит реті бойынша құрастырылған. Кітаптың соңында әрбір шығармаға түсініктеме берілген. Жинаққа енген өлең, поэма, естеліктер музейдің қорынан алынған. Директордың атап өткеніндей, музейде жас мамандарды ғылымға тарту жұмыстары жүргізілуде. Яғни, әрбір жас қызметкерге Абай айналасындағы тұлғалардың шығармаларын зерттеу туралы тапсырма берілген. Мысалы, «Ахат Шәкәрімұлы шығармаларының» бір томдық жинағын музейдің аға ғылыми қызметкері  Гүлназ Бейсембинова құрастырған. Ахат Шәкәрімұлының естеліктері терең тарихи мазмұнымен де өзгешеленеді. Ұзақ жылдар ұстаз болып еңбек еткен тұлғаның мол мұрасы болашақ ұрпақты тәрбиелеуде алар орны ерекше болмақ,- дейді кешке қатысушылар. Мәдени мекеме қызметкерлері жинақ - ғылыми жетістік деп есептейді. Музей мамандары болашақта Көкбай Жанатайұлы мен Шәкір Әбенұлының кітаптарын шығаруды жоспарлап отыр.